Deu 13 | ZomZIV | STEP | Note lakah kamsang ahi a, mang mana thu magen khat ahi zongin hong kilanga, a piandang lim le a lamdang hong lakin

Deuteronomy 13

Pasian Dangte Biakna

1 Note lakah kamsang ahi a, mang mana thu magen khat ahi zongin hong kilanga, a piandang lim le a lamdang hong lakin 2 tuateh a gensa lim le a lamdangte hong tuna, “Adang pasiante zui-in (na theih ngei loh pasiante) tuate bia ni,” a cih leh 3 tua kamsangpa ahikeh mang-manpa thu na ngai peuhmah kei ding uh hi. TOPA note Pasian in na lungsim khempeuh uh le na hinna khempeuh un amah na it uh hiam, cih a muhkhiat nadingin hong zia-et ahi hi. 4 Na zuih pelmawh ding uh le na zahtak pelmawh ding uh TOPA note Pasian ahi hi. Ama thupiakte zui-in mang unla; ama na semin amah lenkip un. 5 Tua kamsangpa ahikeh mangmanpa kithat pelmawh ding hi, bang hang hiam cih leh amah in Egypt gama hong pai khiatpih na sal suahna uh gam pana hong tankhia TOPA note Pasian langdo in thu a hilh hi; amah in zuih dinga TOPA note Pasian in hong thupiak lampi pan note heikhiat ding a hanciam ahi hi. No laka gitlohna na siaksiang pelmawh ding uh hi. ^a

6 Na sanggampa tektek, na tanu na tapa tektek, na it na zi tektek le na kithuahpih na lawmpa tektek in hong zolsimin, “Va pai-in pasian dangte va bia ni,” (nang na hi-a, na pate ahi zongin a theih ngei loh pasiante, 7 na kim na pam uh a nai a gamla, lei mong khat pan mong khata om pasiante) 8 hong cih leh mang loin a thugen zong ngai kei un. Hehpih kei un. Amah hawi loin zong dal kei un. 9 Amah pel loin thah ding ahi hi. Nang in amah na that masa dinga, tua khit ciangin mi khempeuh hi pan ding hi. 10 Amah suangin denglum un, bang hang hiam cih leh amah in note salsuahna Egypt gam pana hong paikhiatpih TOPA note Pasian panin pialsak ding a hanciam ahi hi. 11 Tua ciangin Israel khempeuh in za in lau ding uh a, no lakah kuamah in tua bang gitlohna a bawl nawn kei ding hi.

12 TOPA note Pasian in na ten nadingun hong piak khuapite khatpeuh ah 13 note lakah tua bang migilo khangin amau khuapi sungah mite lam khialh nadingin, “Eite pai-in pasian dangte va bia ni,” (na theih ngei loh uh pasiante) ci-a a makaih khialh lam na zak uh leh 14 pel loin a thu kan unla sittelin siangtakin a thu kantel un. Tua thu a maan hi a, note lakah hih a kihhuai na a kisem khin takpi ahileh 15 tua khua-a teng mi khempeuh namsau in na that taktak ding uh hi. A mite le a ganhingte susia khawm kiuhkeuh ^{▼▼13.15 Hebrew lai-ah TOPA} un. 16 Note in a vante uh lawkin khua laizang tual-awng ah na khawm ding uh a, a khuapi le a sunga van khempeuh TOPA note Pasian tungah meihal biakna bangin a bupin haltum kiuhkeuh un. Tua mun a siasa in om den dinga a kilam kik ngei nawn kei ding hi. 17 TOPA hehluatna a dam kik nadingin tua a kikoihdak nate ^{▼▼13.17 Hebrew in mite le nate TOPA} note khut sungah khat beek a kimu kei ding hi; tua hileh amah in na pute uh tungah kiciamin a khap bangin note hong lainatin hong khuatuah dinga, hong pungsak ding hi, 18 bang hang hiam cih leh note in TOPA note Pasian thu na mang uh a, tuni-a kong piak ama thupiakte khempeuh zui-in ama mitmuh ah thumaanin na gamta uh hi. ^d